مستورة
مستورة من قومة الجهل تريانة ذي جدي الغزال
عينيها ومضات البرق تضوي وتشع من غير دلال
طامح صديره ومنقسم في قامة زي نخل الشمال
سمحة ورصينة مهذبة لله بس يبقي الكمـــــــــــــــال
والـــعبدِ لله الفقيـــر الشــــــــــــوبلي ود حـــــــاج بلال
كان ود مهذب ومنطقي بس للأسف ماعندو مال
عارف قليبو بريده جد لكن كمان صعب المنـــــــال
لي زول عطية مكتفو بقيد حديد بدل الحبـــــــــــال
والشوبلي يصبح يوِح والليل يشيلو بكي وسكال
يندب حظوظو الدنكست يومات يردد للســــــــؤال
ياربي يا خالق الوجود يا مولي يا ياذا الجـــــــــــــــــــلال
هل ها الوضع بنعيشو يوت ولا الفرج جاي لامحال
والشوبلي إتوكل مشي قدام أبوها وقف وقـــــــــــــال
جاييك خير حاج الحسين مستورة دايره بالحلال
إزداد عميري وهمي زاد وتعبت من كتر النضال
قط ما جنيت غير الشقي ومر العذاب والارتحال
حاج الحسين قال ليو أمش لِف للعصير وعليّ تعال
تلقاني راجيك بردود وإنشاء الله يحصل خير وفال
والشوبلي يقعد ويقوم ذي التقول شاف ليو زوال
هّزة الحنين والشوق وقف ،، عمي الحسين أنا هجري طال
قـــــــــــــال ليهو طبعاً يا وجيه شـــــــــــــــــــــــــــــاورت لي ام العيال
قالت: بنيته في حجوز لــــــــــي ود أخوها الليها خــــــال
وانا كنت متمنيك نسيب شان إنت أصلك ود رجال
لكن قسمتك مـــــــــــا هنا وأنا بعتذر علي كل حـــــــال
والشوبلي الود الصبــــــــــور راســـــــخ رسوخ عاتي الجبال
أتهدّ من سمع الخبر حســـــــــــاهو زي وقـــــــــــع النبال
دنقر وصنقع للسماء كرطع لريقو ودمــــــــــعو سال
بلل شنيباتو ونزل منتاكي لا عند النعـــــــــــــــــــــــــــــال
واتذكر آهاتاً كتر يومـــــــــــــــات نكير لــــــــي أمو شال
نفس الدريب فات بيو أبو سفراً رجوعو صبح محال
وما بين فراق الأم وأبوه وأحــــــــــــلام وصول أم العيـــــــال
الشوبلي حسب كتير ولقيتو صبحت في جـــــــــــــدال
يــــــــــارب شن شويت أنا نـــــــازلات علي محناً تقـــــــــــال
هل كان صحيح كل الحصل ولا الكلام ده إكون خيال
إتبدل القلب الوفي الله يجازيك يا ضــــــــــــــــــــــــــــــلال
والشوبلي جنّ وطفش ياأريت إكون للناس مثال